రెండో రోజూ మార్కెట్ల జోరు... మెటల్, ఆటో షేర్ల అండతో లాభాల్లో సూచీలు

దేశీయ స్టాక్ మార్కెట్లు వరుసగా రెండో రోజు లాభాలను నమోదు చేశాయి. మంగళవారం ట్రేడింగ్‌లో తీవ్ర ఒడిదొడుకులు ఎదురైనప్పటికీ, చివరికి సూచీలు లాభాలతోనే ముగిశాయి. రోజంతా లాభనష్టాల మధ్య ఊగిసలాడిన మార్కెట్లకు మెటల్, ఆటో రంగ షేర్లు అండగా నిలిచాయి.

ట్రేడింగ్ ముగిసే సమయానికి, బీఎస్ఈ సెన్సెక్స్ 568 పాయింట్లు లాభపడి 76,070.84 వద్ద స్థిరపడింది. అదేవిధంగా, ఎన్ఎస్ఈ నిఫ్టీ 172.35 పాయింట్లు పెరిగి 23,581.15 వద్ద ముగిసింది. నిఫ్టీలో టాటా స్టీల్, మహీంద్రా అండ్ మహీంద్రా, ఎటర్నల్ షేర్లు మంచి లాభాలను ఆర్జించాయి. అయితే, ఐటీ, ఎఫ్‌ఎంసీజీ రంగాల షేర్లు నష్టపోయాయి.

మిడ్‌క్యాప్, స్మాల్‌క్యాప్ సూచీలు కూడా లాభాలతోనే ముగియడం సానుకూలాంశం. మార్కెట్‌లో అస్థిరతను సూచించే ఇండియా విక్స్ ఇండెక్స్ 8.39 శాతం తగ్గి 19.79కి చేరడం ఇన్వెస్టర్లకు కొంత ఊరటనిచ్చింది.

సాంకేతిక విశ్లేషకుల ప్రకారం, నిఫ్టీ 23,600 స్థాయిని దాటితే 23,800-24,000 స్థాయిలకు చేరే అవకాశం ఉంది. అయితే, ఈ స్థాయి వద్ద అమ్మకాల ఒత్తిడి ఎదురుకావచ్చని అంచనా వేస్తున్నారు. ఒకవేళ నిఫ్టీ పడితే, 23,500 వద్ద మొదటి మద్దతు, ఆ తర్వాత 23,300-23,350 వద్ద బలమైన మద్దతు లభించవచ్చని తెలిపారు. అంతర్జాతీయ అనిశ్చితులు ఇంకా కొనసాగుతున్నందున ఇది పూర్తిస్థాయి ట్రెండ్ రివర్సల్ కాదని, కేవలం తాత్కాలిక రికవరీ మాత్రమేనని నిపుణులు అభిప్రాయపడుతున్నారు.